Psalms 106:6-47

6 ^aTwonoonye, nga bajjajjaffe bwe baakola;
tukoze ebibi ne tusobya nnyo.
7 ^bBakadde baffe
tebaafaayo kujjukira ebyamagero bye wakola nga bali mu Misiri;
n’ebyekisa ebingi bye wabakolera tebaabijjukira,
bwe baatuuka ku Nnyanja Emyufu ne bakujeemera.
8 ^cNaye Mukama n’abalokola, olw’erinnya lye,
alyoke amanyise amaanyi g’obuyinza bwe obungi.
9 ^dYaboggolera Ennyanja Emyufu, n’ekalira;
n’abakulembera okubayisa mu buziba ng’abayita ku lukalu mu ddungu.
10 ^eYabawonya abalabe baabwe;
n’abanunula mu mikono gy’abo ababakyawa.
11 ^fAmazzi ne gabuutikira abalabe baabwe;
ne wataba n’omu awona.
12 ^gOlwo ne bakkiriza ebigambo bye, bye yabasuubiza;
ne bayimba nga bamutendereza.

13 ^hWaayita akabanga katono ne beerabira ebyo byonna bye yakola;
ne batawulirizanga kubuulirira kwe.
14 ⁱBwe baatuuka mu ddungu, okwegomba ne kubasukkirira;
ne bagezesa Katonda nga bali mu lukoola olwo.
15 ^jBw’atyo n’abawa kye baasaba,
kyokka n’abaleetera n’olumbe olw’amaanyi.

16 ^kNga bali mu lusiisira baakwatirwa obuggya eri Musa
ne Alooni abalonde ba Mukama.
17 ^lEttaka ne lyasama ne limira Dasani;
Abiraamu ne banne ne libasaanyaawo.
18 ^mOmuliro ne gukoleera ne gukwata abagoberezi baabwe;
ennimi z’omuliro ne zookya aboonoonyi.
19 ⁿBwe baali e Kolebu ne beekolera ennyana;
ne basinza ekifaananyi ekyo kye baakola mu byuma bye baasaanuusa.
20 ^oEkitiibwa kya Katonda
ne bakiwaanyisaamu ekibumbe ekifaanana ente erya omuddo.
21 ^pNe beerabira Katonda eyabanunula,
eyabakolera ebintu ebikulu bwe bityo mu Misiri,
22 ^qebyamagero bye yabakolera mu nsi ya Kaamu,
n’ebikolwa eby’entiisa ku Nnyanja Emyufu.
23 ^rN’agamba nti,
Ajja kubazikiriza.
Naye Musa, omulonde we, n’ayimirira mu maaso ge
n’amwegayirira, obusungu bwe ne bumuggwaako n’atabazikiriza.

24 ^sBaanyooma eby’ensi ennungi,
kubanga ekisuubizo kye tebaakirinaamu bwesige.
25 ^tBeemulugunyiriza mu weema zaabwe,
ne batagondera ddoboozi lya Mukama.
26 ^uKyeyava yeerayirira
nti alibazikiririza mu ddungu,
27 ^vera nga n’abaana baabwe
balisaasaanira mu mawanga ne bafiira eyo.

28 ^wBaatandika okusinza Baali e Peoli;
ne balya ebyaweebwangayo eri bakatonda abataliimu bulamu.
29Ne banyiiza Katonda olw’ebikolwa byabwe ebibi;
kawumpuli kyeyava abagwamu.
30 ^xNaye Finekaasi n’ayimirira wakati waabwe ne Katonda,
kawumpuli n’agenda.
31 ^yEkyo ne kimubalirwa nga kya butuukirivu
emirembe gyonna.
32 ^zBwe baatuuka okumpi n’amazzi ag’e Meriba ne banyiiza Mukama,
ne baleetera Musa emitawaana;
33 ^aakubanga baajeemera ebiragiro bye,
ne kimwogeza n’ebigambo ebitaali bya magezi.

34 ^abAbantu be baalwanyisa tebaabazikiriza
nga Mukama bwe yali abalagidde,
35 ^acnaye beetabika n’abannaggwanga ago
ne bayiga empisa zaabwe.
36 ^adBaasinza ebifaananyi ebikole n’emikono eby’amawanga ago
ne bibafuukira omutego.
37 ^aeBaawaayo batabani baabwe
ne bawala baabwe eri bakatonda abo.
38 ^afNe bayiwa omusaayi gwa batabani baabwe ne bawala baabwe
abataliiko musango,
be baawangayo eri ebifaananyi ebikole n’emikono Abakanani bye baakola,
ensi n’eyonoonebwa n’omusaayi gwabwe.
39 ^agBeeyonoona olw’ebyo bye baakola,
ebikolwa byabwe ne bibafuula abataliimu nsa nga bavudde ku Katonda waabwe.

40 ^ah Mukama kyeyava asunguwalira abantu be,
n’akyawa ezzadde lye.
41 ^aiN’abawaayo eri amawanga amalala,
abalabe ne babafuga.
42Abalabe baabwe ne babanyigiriza,
ne babatuntuza nnyo ddala.
43 ^ajYabawonyanga abalabe baabwe emirundi mingi,
naye obujeemu ne bubalemeramu,
ebibi byabwe ne bigenda nga bibasaanyaawo.

44 ^akNaye bwe yawulira okukaaba kwabwe,
n’abakwatirwa ekisa;
45 ^alku lwabwe, n’ajjukira endagaano ye;
okwagala kwe okungi ne kumuleetera okukyusa ekirowoozo kye.
46 ^amN’abaleetera okusaasirwa
abo abaabawambanga.
47 ^anAyi Mukama Katonda,
otulokole, otukuŋŋaanye, otuggye mu mawanga,
tulyoke twebazenga erinnya lyo ettukuvu,
era tusanyukenga nga tukutendereza.